Beth sy’n cael ein cefnogaeth ariannol

Mae gan y Cyngor Cefn Gwlad bedair gategori ar gyfer grantiau, a’r rheiny’n adlewyrchu rhychwant eang ein gwaith. Dyma amlinelliad ohonyn nhw:

Bywyd gwyllt, Daeareg a Thirwedd

Amcan cyffredinol y grant yw hybu a symbylu gweithredu cadarnhaol ar gyfer bywyd gwyllt, daeareg a thirwedd. Mae ein cefnogaeth dan y categori yma’n eang ac amrywiol, a’n bwriad yw ceisio galluogi i brosiectau gael eu cyflawni ym mhob grŵp tacsonomig, yn ogystal â gweithredu geo-amrywiaeth. Mae ein blaenoriaethau ar gyfer ‘Tirwedd’ yn ymwneud â’r angen i integreiddio ein gwybodaeth ofodol bresennol eang gyda pholisi a phrosesau sy’n gwneud penderfyniadau ar lefel Genedlaethol, Ranbarthol a Lleol.

Darparu a Hybu Mynediad, Hamdden a’u Manteision

Amcan y grant yw cynyddu cymryd rhan mewn hamdden yn yr awyr agored drwy gysylltu’r ddarpariaeth o gyfleoedd â’r galw amdanynt, ac felly gwrdd yn y ffordd orau ag anghenion buddianwyr / defnyddwyr lleol am hamdden a mynediad. Fe fydd manteision o ran iechyd a’r amrywiaeth o ddefnyddwyr cefn gwlad yn ystyriaethau cryf wrth inni flaenoriaethu’r prosiectau.

Adeiladu Cynhwysedd mewn Sefydliadau Eraill

Mae’r categori grant “Adeiladu Cynhwysedd” yn cefnogi rhaglenni gwaith mewn amrywiaeth eang o feysydd polisi. Fe fydd y Cyngor Cefn Gwlad yn rhoi blaenoriaeth i’r rhwydweithiau neu’r partneriaethau hynny sy’n cynorthwyo’r Cyngor i ymgysylltu â fframweithiau polisi cenedlaethol, ac yn cynorthwyo i osod blaenoriaethau yn unol â’n cyfrifoldeb i reoli treftadaeth naturiol Cymru, tirwedd, bioamrywiaeth a mwynhad o gefn gwlad. Pan fo partneriaethau lleol eisoes yn cyflenwi’r uchod, fe fyddai’n rhaid i’r rhain ddangos cymhwysedd ehangach drwy Gymru. Pan fo dyblygu neu orgyffwrdd yn digwydd, fe fydd Y Cyngor Cefn Gwlad yn ceisio dod â’r meysydd hynny ynghyd dan un bartneriaeth, ble bo hynny’n ymarferol.

Hybu Dealltwriaeth ac Ymwybyddiaeth

Ar y cyd â’n partneriaid, rydym am gynyddu lefel ymwybyddiaeth o faterion amgylcheddol ymysg pob sector o’r boblogaeth – gan gynorthwyo i greu diwylliant o fyw cynaliadwy a pharch tuag at yr amgylchedd drwy Gymru, yn ogystal ag adeiladu sgiliau amgylcheddol.

Yn ogystal, uchelgais y Cyngor Cefn Gwlad eleni yw ariannu rhagor o brosiectau sy’n cefnogi dysgu y tu allan i’r ystafell ddosbarth yn yr amgylchedd naturiol. Fe ddylai’r prosiectau hyn greu profiadau hamdden a dysgu o ansawdd uchel, pleserus ar gyfer plant a phobl ifanc o fewn y sector addysgol ffurfiol. Rydym wedi clustnodi £150,000 yn arbennig ar gyfer y prosiectau hyn.