Beth sy’n cael ein cefnogaeth ariannol drwy grantiau

Mae pob un ohonom yn dibynnu ar yr amgylchedd naturiol. Yr amgylchedd sy’n rhoi pethau hanfodol bywyd inni ac yn ein hysbrydoli, ac mae’n gwbl ganolog i’n hiechyd, ein cyfoeth a’n hapusrwydd. Rydym yn cael llawer iawn o bethau gan yr amgylchedd naturiol: adnoddau a deunyddiau crai i’w defnyddio, gwasanaethau i’n cynnal, a buddion personol trwy ei fwynhau. Fel cymdeithas, mae angen inni drysori’r buddion hyn. Trwy eu trysori, gallwn sicrhau y bydd pobl ar eu hennill, yn awr ac yn y dyfodol.

Mae’r ffenestr ceisiadau am grant yn awr ar gau.

Blaenoriaethau’r Cyngor Cefn Gwlad ar gyfer grantiau 2013-2014

Yn y byd economaidd anodd sydd ohoni, rhaid inni sicrhau bod ein grantiau’n gweithio’n galed i gyflawni ein hamcanion, ar y cyd ag eraill. Dyna pam y mae’r Cyngor Cefn Gwlad yn dymuno i’w grantiau gynorthwyo sefydliadau yng Nghymru sy’n ymhél ag amrywiaeth eang o weithgareddau – o ddysgu am geoamrywiaeth, bioamrywiaeth ac ecosystemau i sicrhau amgylchedd naturiol iach, o alluogi pobl i fwynhau’r awyr agored i sicrhau datblygu economaidd cynaliadwy.

Golofnau a themâu trawsbynciol

Mae gan y Cyngor Cefn Gwlad dair o golofnau grant, a nodir uchod. Mae’r rhain yn adlewyrchu cwmpas ein gwaith, a dylai pob grant orwedd o fewn un (neu fwy) o’r colofnau hyn – darllenwch isod i gael mwy o fanylion am bob colofn grant. Er ein bod yn edrych i gyfeiriad ein partneriaid mewn Awdurdodau Lleol i gyflawni gwaith mewn modd cyfartal ar draws y colofnau, dylai’r holl brosiectau arwain at fuddion amgylcheddol i’r gymdeithas a’r economi. Felly, er mwyn bod yn gymwys i gael grant rhaid i’r prosiectau arwain at fuddion dan o leiaf un o’r themâu trawsbynciol, sef adfywio, iechyd a lles, meithrin gallu o fewn sefydliad neu o fewn y sector amgylcheddol yn ei grynswth, neu brosiectau sy’n cefnogi neu’n profi egwyddorion Fframwaith yr Amgylchedd Naturiol.

Bwriad ein grantiau yw sbarduno gwaith arall. O’r herwydd, mae’r Cyngor Cefn Gwlad yn chwilio am brosiectau grant a fydd yn datblygu, yn treialu ac yn arddangos, yn ogystal â chyflawni buddion uniongyrchol. Fel arfer, bydd y Cyngor Cefn Gwlad yn cynnig arian a all helpu i roi prosiectau ar y gweill neu alluogi sefydliadau i ddatblygu mentrau.

Byddwn yn blaenoriaethu’r cynigion y bydd yr ymgeiswyr yn eu datblygu ar y cyd â’r Cyngor Cefn Gwlad, gan anelu at weithio mewn modd cydlynol. Trwy wneud hyn, byddwn yn cynyddu gwerth ac effaith y gwaith sy’n cefnogi ein blaenoriaethau o safbwynt grantiau.

Fel arfer, nid ydym yn rhoi grantiau i brosiectau sydd ar y gweill yn barod, nac ychwaith i waith cynnal a chadw. Ymhellach, fel arfer nid ydym yn rhoi grantiau ar gyfer seilwaith, oni bai bod y seilwaith dan sylw yn gwbl ganolog i’r prosiectau. Ychwaith, nid ydym yn rhoi cymorth i waith cyffredinol yn ymwneud â datblygu gwefannau. Fodd bynnag, byddwn yn ystyried ariannu gwe-dudalennau ac atebion digidol arloesol sy’n gwbl ganolog i lwyddiant prosiectau.

Bydd yn rhaid croesgyfeirio'r ffurflen gais ddangosol i golofnau a themau trawsbynciol grantiau'r Cyngor Cefn Gwlad Cymru ynghyd â'r Canlyniadau Cynllun Corfforaethol. Gweler 'Erthyglau perthnosol' am fwy o wybodaeth.