Michael Griffith

Cadeirydd presennol y Cyngor yn talu teyrnged i Michael Griffith

Newyddion trist iawn oedd clywed am farwolaeth cyn Gadeirydd y Cyngor Cefn Gwlad, Michael Griffith CBE.

Ffermwr a thirfeddiannwr o Drefnant, Sir Ddinbych, oedd Michael Griffith, 75, ac ef oedd Cadeirydd cyntaf y Cyngor. Bu yn y swydd honno am 10 mlynedd, rhwng 1990 a 2000.

Wrth dalu teyrnged i Michael Griffith, dyma a ddywedodd John Lloyd Jones, Cadeirydd presennol y Cyngor:

“Roedd Michael wedi ymrwymo’n llwyr i’r gwasanaethau cyhoeddus. Doeth iawn oedd ei ddewis fel Cadeirydd cyntaf y Cyngor, a dylanwadodd lawer ar lywio’r modd y datblygodd y sefydliad. Credai’n gryf mewn creu partneriaeth â thirfeddianwyr, cyrff gwirfoddol a sefydliadau eraill.

“Un o’r prif bethau a gyflawnodd oedd datblygu cynllun amaeth-amgylcheddol peilot Tir Cymen a chynllun Tir Gofal Cymru gyfan. Mae’r gwaith yma’n crisialu ei gred angerddol y gall gwarchod natur fynd law yn llaw â ffermio mewn ffordd sy’n gydnaws â’r amgylchedd.”

Mae gan nifer o’r rhai a weithiodd ochr yn ochr ag ef yn y Cyngor straeon difyr ac atgofion melys amdano. Roedd cefn gwlad yn agos iawn at ei galon, a daeth ag ymagwedd graff a phragmatig i’r sefydliad.

Estynnwn ein cydymdeimlad llwyr i deulu Michael Griffith.