Canu’n Iach I’n Cadeirydd

Ar ôl deng mlynedd o arwain Cyngor Cefn Gwlad Cymru, fe fydd John Lloyd Jones, yn cadeirio ei gyfarfod Cyngo olaf Ddydd Llun 22 Chwefror 2010.

Ffermwr o Dywyn, Gwynedd yw John Lloyd Jones, a daeth yn Gadeirydd y Cyngor Cefn Gwlad yn y flwyddyn 2000.Yn y gorffennol, mae wedi bod yn Gadeirydd NFU Cymru ac yn aelod o Barc Cenedlaethol Eryri. Mae wedi’i benodi bellach yn Aelod o Fwrdd Cenedlawthol y Comisiwn Coedwigaeth yng Nghymru.

Wrth edrych yn ôl dros ei gyfnod fel Cadeirydd y Cyngor Cefn Gwlad, dyma a ddywedodd John Lloyd Jones:

“Rydw i’r un mor argyhoeddedig ag erioed mai’r ffordd orau o lwyddo yw cael ffermwyr a’r sector amgylcheddol i gydweithredu. Mae dau faes arbennig yn enghreifftiau perffaith o hyn – mae ein profiad o gyflwyno hawliau mynediad ar dir agored wedi dangos pa mor werthfawr yw gweithio gyda’n gilydd; ac, wrth gwrs, ddylen ni ddim anghofio am redeg cynllun Tir Gofal ar ran Llywodraeth y Cynulliad. Mae’r meysydd allweddol yma wedi helpu staff y Cyngor Cefn Gwlad a ffermwyr i ddeall ei gilydd yn well. Gobeithio y gallwn ni adeiladu ar hyn wrth helpu i greu Glastir, sef y cynllun amaeth-amgylcheddol newydd.

“Yn ystod fy nghyfnod fel Cadeirydd, rydyn ni wedi dysgu llawer mwy am y cyfraniad mae cefn gwlad a’r awyr agored yn ei wneud at iechyd a’r economi, ac o bwysigrwydd cynyddol parciau trefol a gwyrddfannau.

“Fodd bynnag, yr agoriad llygad mwyaf i mi oedd amgylchedd y môr. Cyn imi ddechrau ar fy swydd fel Cadeirydd, doeddwn i’n gwybod dim byd amdano – er ’mod i’n gallu gweld y môr o ffenest y gegin! Ond mae’r môr wedi bod yn rhan bwysig o’n gwaith, a bydd yn parhau i fod felly yn y dyfodol wrth inni geisio rhoi Deddf y Môr ar waith yma yng Nghymru.”

Meddai Roger Thomas, Prif Weithredwr y Cyngor Cefn Gwlad:

“Mae John Lloyd Jones wedi bod yn gaffaeliad mawr i’r sefydliad, ac fe hoffwn ddiolch o galon iddo am ei waith caled a’i ymroddiad. Mae’r sefydliad yma’n bur wahanol heddiw i’r hyn oedd o ddeng mlynedd yn ôl pan gafodd John ei benodi – yn wir, mae o wedi bod yn feistr wrth y llyw. Mae wedi ein helpu i gyflawni prosiectau allweddol ar ran Llywodraeth y Cynulliad, er enghraifft Tir Gofal, Mynediad Agored, dynodi Safleoedd Ewropeaidd – Ardaloedd Cadwraeth Arbennig i enwi dim ond rhai. Ac mae ei ymrwymiad wedi sicrhau bod y Cyngor Cefn Gwlad yn dal i fod ar flaen y gad o safbwynt gwarchod amgylchedd Cymru.”

Bydd Morgan Parry, Cadeirydd newydd y Cyngor Cefn Gwlad, yn dechrau ar ei swydd ar 1 Mawrth, a hynny am dair blynedd.

DIWEDD

Am fwy o fanylion, cysylltwch a Meinir Wigley ar 07720 428644

Nodiadau i Olygyddion

Corff a Noddir gan Lywodraeth y Cynulliad yw’r Cyngor Cefn Gwlad, ac mae’n gweithio i gael Cymru well lle mae pawb yn trysori ein hamgylchedd naturiol ac yn ei warchod. Gellir cael mwy o wybodaeth am ein gwaith ar www.ccgc.gov.uk.