Dirwyo dyn am chwalu safle clwydo ystlumod

Mae Ynadon Sir Gaerfyrddin wedi dirwyo dyn am chwalu adeilad yn Wood End, Llanmilo, Pentywyn, ac yntau’n gwybod yn iawn fod safle clwydo ystlumod i’w gael yno.

Cafodd y dyn ddirwy o £1000 am chwalu safle clwydo ystlumod lleiaf ac ystlumod hirglust, ynghyd â £500 o gostau, ar ôl iddo bledio’n euog i dorri Rheoliadau Cadwraeth (Cynefinoedd Naturiol) 1994 a Deddf Bywyd Gwyllt a Chefn Gwlad 1981.

Yn ôl Steven Lucas, Swyddog Rhywogaethau a Bioamrywiaeth y Cyngor Cefn Gwlad: “Mae ystlumod lleiaf ac ystlumod hirglust mewn perygl a dan fygythiad a meant wedi eu gwarchod gan ddeddfwriaeth Ewropeaidd a’r DU. Dylai’r erlyniad yma fod yn rhybudd i eraill ei bod hi’n drosedd torri is-ddeddfau sy’n gwarchod y rhywogaethau yma.”

Ychwanegodd: “Mae’r Cyngor Cefn Gwlad yn awyddus i weithio’n agos efo’r diwydiant adeiladu a datblygwyr i gael cydbwysedd rhwng buddiannau’r gwaith datblygu a buddiannau’r rhywogaethau pwysig sy’n cael eu gwarchod, gan geisio atal troseddau rhag cael eu cyflawni. Ond rydym yn ddiolchgar i Wasanaeth Erlyn y Goron am fwrw ymlaen efo’r achos yma a chael canlyniad llwyddiannus.”

Caiff pob ystlum ei warchod dan Atodlen 5 Deddf Bywyd Gwyllt a Chefn Gwlad 1981. Golyga hyn ei bod hi’n anghyfreithlon i rywun ladd, anafu, cymryd neu darfu ar ystlumod yn fwriadol, neu niweidio neu ddinistrio’u safle clwydo. Gan fod ystlumod yn tueddu i ddychwelyd i’r un safle clwydo bob blwyddyn, mae’r safleoedd yma’n cael eu gwarchod boed ystlumod i’w cael ynddyn nhw, ai peidio.

Mae ystlumod yn clwydo mewn amryw o lefydd, gan gynnwys mewn adeiladau a thoeau. Gallwch ddod o hyd iddynt unrhyw adeg o’r flwyddyn; ond yn ystod yr haf y maen nhw i’w gweld amlaf, pan fydd rhai rhywogaethau’n sefydlu cytrefi bridio.

I gael cyngor a gwybodaeth am yr hyn y dylech ei wneud os oes gennych ystlum yn eich to, cysylltwch â thîm ymholiadau’r Cyngor ar 0845 1306 229 neu archebwch gopi o ‘Ystlumod mewn Toeau’ ar wefan Cyngor Cefn Gwlad Cymru.

DIWEDD

• I gael mwy o wybodaeth am y datganiad hwn, ffoniwch Delyth Willis, Swyddog Cysylltiadau Cyhoeddus Rhanbarthol y Cyngor Cefn Gwlad, ar 029 2077 2455, neu anfonwch e-bost at d.willis@ccw.gov.uk.
• Cynghorwr annibynnol y llywodraeth yw’r Cyngor Cefn Gwlad, ac mae’n gweithio i gael Cymru well lle mae pawb yn trysori ein hamgylchedd naturiol ac yn ei warchod. Gellir cael mwy o wybodaeth am ein gwaith ar www.ccw.gov.uk
• Hugh Clark tynnodd lun yr ystlym.