Y Fflint i gynnal digwyddiad cymunedol am ddim i ddathlu lansio Llwybr Arfordir Cymru

Bydd Y Fflint yn nodi’r agor swyddogol ar Lwybr Arfordir Cymru ar Ddydd Sadwrn, 5 Mai, gan arddangos arfordir Cymru ar ei orau.

Gwahoddir aelodau’r cyhoedd i fynychu’r digwyddiad a dathlu’r prosiect carreg filltir cyffrous hwn i Gymru. Yn y dathlu cymunedol bydd busnesau a chynhyrchwyr bwyd a diod lleol, grwpiau o’r gymuned a diddanwyr yn dod at ei gilydd yng Nghastell y Fflint i nodi agor y llwybr arfordir sy’n 870 milltir (1400km) o hyd a hyrwyddo’r hyn sy’n cael ei gynnig ar hyd arfordir trawiadol Cymru.

Bydd Llwybr Arfordir Cymru yn mynd o’r ffin â Lloegr yn y gogledd i Gas-gwent yn y de. Ar ôl ei agor, hwn fydd y llwybr arfordirol di-dor cyntaf yn y Byd o amgylch un wlad.

Bydd yr achlysur yn dechrau tua 11.00 y bore a bydd perfformwyr fel Côr Meibion y Fflint a Band Ceilidh Moincoin yno ar y prif lwyfan. Bydd yr adloniant i’r plant yn cynnwys gweithdai hud a lledrith ac adroddwr chwedlau yn dweud hanesion am yr arfordir.

Bydd y grwpiau a’r cyrff sy’n cynnig gwasanaethau ar hyd Llwybr Arfordir Cymru yn hyrwyddo’u gwaith ac yn rhoi golwg ichi arno mewn ‘Arddangosfa Arfordir’ arbennig. Bydd cynhyrchwyr bwyd a diod lleol hwythau yno i roi ‘Blas ar yr Arfordir’ i’r ymwelwyr wrth roi cyfle i brofi eu nwyddau a’u cynnyrch.

Fel rhan o’r dathliadau mae Cerddwyr Cymru yn trefnu’r Daith Gerdded Arfordirol Fawr Gymreig. Cynhelir teithiau cerdded ar draws Cymru i gyd-fynd â’r lansio ac anogir aelodau’r cyhoedd i gymryd rhan a chael profi hyfrydwch arfordir Cymru. Ceir manylion am y teithiau cerdded sy’n cael eu trefnu ar wefan Cerddwyr Cymru (www.ramblers.org.uk).

Mae Llwybr Arfordir Cymru wedi ei ddatblygu gan Lywodraeth Cymru mewn partneriaeth gyda Chyngor Cefn Gwlad Cymru (CCGC), un ar bymtheg o awdurdodau lleol a dau Barc Cenedlaethol.

Yn ychwanegol at yr ariannu gan Lywodraeth Cymru a’r awdurdodau lleol ar hyd yr arfordir o tua £2 filiwn y flwyddyn, mae Cronfa Datblygu Rhanbarthol Ewrop wedi dyrannu bron i £4 miliwn dros bedair blynedd i gefnogi’r prosiect.

Diwedd.

Am fwy o wybodaeth, cysylltwch â Rhiannon Jenkins, Quadrant, ar 02920 694888 neu ebost: rhiannon.jenkins@quadrant.co

NODIADAU AR GYFER GOLYGYDDION

• Bydd Llwybr Arfordir Cymru, sef 870 milltir (1,400km) o hyd, a fydd yn agor ar 5 Mai 2012, yn arwain o gyrion Caer yn y gogledd i Gas-gwent yn y de.
• Mae creu’r Llwybr yn ymrwymiad allweddol gan Lywodraeth Cymru – gyda’r nod o ddod â budd economaidd i ardaloedd arfordirol ac annog ffyrdd o fyw egnïol. Mae gan y Llwybr rywbeth i’w gynnig i bawb – o’r rhai sy’n edrych am dro byr i’r rhai sy’n ymgymryd â’r llwybr cyfan mewn un daith, ac mae’n rhoi mynediad i nifer o weithgareddau hamdden.
• Caiff gwelliannau pellach eu gwneud i’r llwybr, o ran aliniad, seilwaith a gwybodaeth, y tu hwnt i’r dyddiad agor.
• Caiff cyflawni’r prosiect ei gydlynu gan Gyngor Cefn Gwlad Cymru a chaiff ei gyflawni ar lawr gwlad gan yr awdurdodau lleol y mae’r llwybr yn mynd drwyddynt. Daw’r arian o’r Undeb Ewropeaidd (cyfanswm o tua £4 miliwn), Llywodraeth Cymru (tua £2 filiwn y flwyddyn) a’r awdurdodau lleol.