Cytundeb Newydd Rhwng Sefydliadau Amgylcheddol

Heddiw, 22 Chwefror, fe fydd Ymddiriedolaethau Natur Cymru a’r Cyngor Cefn Gwlad yn gosod seiliau i weithio gyda’i gilydd i greu amgylchedd sy’n doreithiog o fywyd gwyllt i Gymru a’i thrigolion, drwy arwyddo cytundeb partneriaeth arloesol – Concordat.

Bydd Derek Thomas, Cadeirydd Ymddiriedolaethau Natur Cymru – corff mantell ar gyfer y chwe Ymddiriedolaeth Natur yng Nghymru – a John Lloyd Jones, Cadeirydd y Cyngor Cefn Gwlad fydd yn mynd ati i’w arwyddo. Mae’n nodi sut y gall y naill sefydliad a’r llall elwa drwy weithio gyda’i gilydd. Bydd cytundeb grant am dair blynedd yn sylfaen i’r Concordat hwn.

Dyma rai enghreifftiau o’r math o waith lle gall y ddau bartner gydweithio:

• Gweithio gyda’i gilydd er mwyn creu ystod o brosiectau addysgol a chymunedol, cyfleoedd i wirfoddoli a lleoliadau i fyfyrwyr, fel y gellir helpu pobl i ddeall yr amgylchedd naturiol, ei warchod a’i drysori.
• Cyd reoli ambell Safle o Ddiddordeb Gwyddonol Arbennig, gyda’r nod o roi stop ar golli bioamrywiaeth.
• Ceisio galluogi’r Ymddiriedolaethau Natur i ymateb i geisiadau cynllunio sy’n gysylltiedig â safleoedd bywyd gwyllt lleol.
• Rhannu adnoddau a gwybodaeth pan fo modd, gan weithio gyda’i gilydd i greu incwm ar gyfer y sector amgylcheddol.

Yn ôl Derek Thomas, Cadeirydd Ymddiriedolaethau Natur Cymru:

“Ers amser maith, mae’r Ymddiriedolaethau Natur a’r Cyngor Cefn Gwlad wedi rhannu’n un amcanion o gael amgylchedd iach ac amrywiol. Ar ôl troedio llwybr maith, o’r diwedd rydyn ni wedi esgor ar y Concordat, fydd yn ddechreuad i daith newydd. Mae’n dod â’r chwe Ymddiriedolaeth Natur yng Nghymru, yn ogystal â’r Cyngor Cefn Gwlad, at ei gilydd. Bydd yn cynnig perthynas sy’n fwy addas ar gyfer y dyfodol. Drwy rhoi bobl yn rhan o’u hamgylchedd rydym yn sicr y gall y Concordat yma helpu i wella ansawdd bywyd pobl Cymru.

“Addas iawn yw ein bod ni’n arwyddo’r cytundeb yma yn ystod 2010, sef Blwyddyn Ryngwladol Bioamrywiaeth.”

Meddai John Lloyd Jones, Cadeirydd y Cyngor Cefn Gwlad sydd ar fin ymddeol o’i swydd:

“Yn ystod y blynyddoedd nesaf, fe fydd sialensiau amgylcheddol ac economaidd enfawr yn ein hwynebu. O’r herwydd, mae’r ffaith y gall ein sefydliadau weithio gyda’i gilydd, rhannu costau ac arloesi yn bwysicach nag erioed o’r blaen. Ymhellach, mae’r bartneriaeth yn ategu uchelgais Llywodraeth y Cynulliad o gael gwell cydweithio rhwng y sector cyhoeddus a’r trydydd sector.

“Wrth i ’nghyfnod fel Cadeirydd y Cyngor Cefn Gwlad ddod i ben, rydw i wrth fy modd mai un o ’nhasgau olaf fydd arwyddo cytundeb partneriaeth hollbwysig gyda’r trydydd sector. Dyma’r Concordat cyntaf yn hanes y Cyngor Cefn Gwlad a’r Ymddiriedolaethau Natur drwy Gymru a Lloegr, felly rydw i’n gwybod o’r gorau y bydd cryn graffu ar y dull arloesol sydd wedi’i roi ar waith. Yn wir, fe allai fod yn batrwm yn y dyfodol ar gyfer cyrff cyhoeddus a chyrff gwirfoddol y sector amgylcheddol.”

DIWEDD

I gael mwy o wybodaeth, cysylltwch â:

• Meinir Wigley, Cyngor Cefn Gwlad ar 07720 428644.
• Liz Shankland, Rheolwr y Wasg a Cysylltiadau Cyhoeddus, Ymddiriedolaeth Natur Cymru ar 07970 780558.

Gwahoddiad i ffotograffwyr:

• Mae croeso i ffotograffwyr fod yn bresennol ar gyfer arwyddo’r Conordat. Bydd Derek Thomas a John Lloyd Jones yn ei arwyddo yng Ngwesty’r Marriott, Caerdydd am 3pm, 22 Chwefror 2010.

Nodiadau ar gyfer golygyddion:

1. Corff mantell yw Ymddiriedolaethau Natur Cymru sy’n cynnwys chwech o fudiadau a chanddynt 22,000 o aelodau ar hyd a lled Cymru. Gyda’i gilydd, maen nhw’n rheoli mwy na 200 o warchodfeydd natur ym mhob cwr o’r wlad.
2. Corff a Noddir gan Lywodraeth y Cynulliad yw’r Cyngor Cefn Gwlad, ac mae’n gweithio i gael Cymru well lle mae pawb yn trysori ein hamgylchedd naturiol ac yn ei warchod. Gellir cael mwy o wybodaeth am ein gwaith ar www.ccgc.gov.uk