Rheolau Newydd Ar Lusg-Rwydo Am Gregyn Bylchog

Mae Elin Jones, y Gweinidog dros Faterion Gwledig, wedi cyhoeddi rheoliadau newydd i lywodraethu pysgota am gregyn bylchog ar hyd arfordir Cymru o 1 Mawrth 2010 ymlaen.

Nod y rheoliadau newydd yw sicrhau bod llai o bysgota am gregyn bylchog yn nyfroedd Cymru. Byddant hefyd yn gwahardd treillio am gregyn bylchog mewn sawl ardal benodol o amgylch arfordir Cymru gan eu bod wedi'u dynodi fel ardaloedd sy'n bwysig i rywogaethau a chynefinoedd morol sy'n agored i niwed. Bydd hyn yn helpu i gynnal diwydiant cregyn bylchog hyfyw a chynaliadwy i bysgotwyr sy'n pysgota yn nyfroedd Cymru.

Meddai Elin Jones: "Penderfynais gyflwyno'r rheoliadau hyn gan fod mwy a mwy o dreillio am gregyn bylchog wedi bod yn digwydd ym Mae Ceredigion dros y blynyddoedd diwethaf.

“Bydd y rheoliadau newydd yn helpu i amddiffyn stociau cregyn bylchog a diogelu rhywogaethau a chynefinoedd pwysig y môr drwy amrywiaeth o gyfyngiadau technegol a gofodol.

"Bydd y mesurau technegol yn gwella'r ffordd o reoli pysgodfeydd cregyn bylchog yn nyfroedd Cymru, tra bydd y cyfyngiadau gofodol yn rheoli gweithgareddau yn yr ardaloedd sydd wedi'u dynodi fel rhai sy'n bwysig i rywogaethau a chynefinoedd morol sy'n agored i niwed. Ac eithrio rhan o'r Ardal Cadwraeth Arbennig ym Mae Ceredigion, fydd dim treillio am gregyn bylchog mewn unrhyw Ardal Cadwraeth Arbennig arall yn nyfroedd Cymru.

"Yn dilyn ymgynghoriad 10 wythnos, yn ogystal ag arolwg sydd newydd ei gynnal ym Mae Ceredigion gan Brifysgol Bangor a chyngor sydd wedi'i roi gan Gyngor Cefn Gwlad Cymru, dw i wedi penderfynu caniatáu treillio am gregyn bylchog mewn un rhan o Ardal Cadwraeth Arbennig Bae Ceredigion.

"Byddwn yn ystyried gwneud asesiad tebyg i'r un a wnaed yn ddiweddar mewn un rhan o Fae Ceredigion, a allai arwain at ailystyried y sefyllfa mewn ardaloedd lle mae treillio wedi'i wahardd ar hyn o bryd."

Mae'r rheoliadau newydd yn cynnwys:

O 2011 ymlaen, byrhau hyd y tymor treillio o un mis (h.y. fydd dim hawl i bysgota am gregyn bylchog rhwng 1 Mai a 31 Hydref bob blwyddyn)
Gwahardd treillio am gregyn bylchog o fewn yr ardal 0 - 1 filltir forol o gwmpas arfordir Cymru
Gwahardd treillio am gregyn bylchog mewn ardaloedd penodol sydd wedi'u dynodi fel rhai sy'n bwysig i rywogaethau a chynefinoedd morol sy'n agored i niwed.
Cyfyngu ar nifer y cychod treillio a ganiateir yn nyfroedd Cymru
Cyfyngu ar uchafswm pŵer injans cychod

Meddai Keith Davies, Pennaeth Polisi Amgylcheddol Cyngor Cefn Gwlad Cymru: "Mae Cyngor Cefn Gwlad Cymru'n croesawu penderfyniad y Gweinidog, sy'n rhoi sail am y tro cyntaf i fframwaith strategol yng Nghymru, ac yn diogelu rhywogaethau a chynefinoedd morol pwysig ar yr un pryd.

"Bydd Llywodraeth Cynulliad Cymru a Chyngor Cefn Gwlad Cymru yn parhau i weithio mewn partneriaeth i wneud pob ymdrech i wella iechyd ein moroedd er budd ein bywyd gwyllt a'r rheini y mae'u bywoliaeth yn ddibynnol arno."

Nodiadau

Gorchymyn Pysgota Cregyn Bylchog (Cymru) 2010
Cyfyngiadau Gofodol
Gellir gweld siart eglurhaol yn dangos y cyfyngiadau gofodol ar dudalen we pysgodfeydd Cynulliad Cenedlaethol Cymru. Mae swyddogion yn parhau i weithio gyda'r diwydiant i ddatblygu mesurau rheoli ar gyfer y bysgodfa ar gyfer y dyfodol.