Cynllun Cydraddoldeb Strategol Cyngor Cefn Gwlad Cymru

Mae Rheoliadau Deddf Cydraddoldeb 2010 (Dyletswyddau Statudol) (Cymru) 2011 yn ei gwneud yn ofynnol inni gyhoeddi Cynllun Cydraddoldeb Strategol erbyn 2 Ebrill 2012.

Mae ein cynllun yn casglu ac yn adeiladu ar y gweithgareddau rydym wedi bod yn mynd i’r afael â nhw yn ystod y pedair blynedd diwethaf, fel y nodir yn y Cynllun Cydraddoldeb a’r Cynllun Gweithredu a gyhoeddwyd gennym yn barod. Roedd y rhain yn ymdrin â chydraddoldebau a chyfiawnder cymdeithasol.

Yn benodol, mae’r Cynllun Cydraddoldeb Strategol hwn yn nodi’n glir beth yn union yw ein hamcanion strategol parthed cydraddoldeb a sut rydym yn bwriadu eu cyflawni. Ymhellach, mae’n disgrifio sut rydym yn monitro’r hyn a wnawn a beth yn union yw’r effeithiau, gan adrodd hefyd ar y modd rydym wedi newid ac addasu ein dulliau er mwyn rhoi ystyriaeth i Reoliadau Cydraddoldeb Cymru.

Yn ein tyb ni, mae’r cynllun hwn yn bodloni anghenion y rheoliadau, a bydd yn sicrhau ein bod yn parhau i wella ein hymdrechion yn y maes, gan gyflawni ein dyletswydd cydraddoldeb gyffredinol a rhagori ar hyn pan fo modd.

Os byddwch angen gwybodaeth mewn fformat arall – er enghraifft fformat hawdd ei ddarllen, print mawr, Braille, tâp clywedol – neu os hoffech i’r cynllun gael ei esbonio ichi yn eich iaith eich hun, cysylltwch â’r canlynol: Nia Blackwell i’r cyfeiriad uchod neu trwy ebost i n.blackwell@ccw.gov.uk