Un wlad, dwy iaith...

Yng Nghyngor Cefn Gwlad Cymru rydym yn gweithio drwy gyfrwng dwy iaith - Cymraeg a Saesneg. Mae gallu ein staff i ysgrifennu a siarad Cymraeg yn amrywio ond o ran cwrteisi i’n cwsmeriaid sy’n siarad Cymraeg, disgwyliwn i bob aelod o’n staff ynganu enwau llefydd yn gywir a defnyddio cyfarchion ac ymatebion syml, megis Bore Da, ’Pnawn Da, Diolch ayb.

Rhoddwn gryn bwyslais ar allu defnyddio iaith o’ch dewis, pa un ai eich bod yn gwsmer neu’n aelod o staff. Felly, cynigiwn wasanaeth dwyieithog i’n cwsmeriaid a byddwn bob amser yn ymateb i chi yn y Gymraeg neu Saesneg yn ôl eich dewis. Rydym yn gwneud cryn dipyn o’n gwaith yn ardaloedd gwledig Cymru lle mae’r mwyafrif o bobl yn siarad Cymraeg ac felly mae’n bwysig ein bod yn gallu cyfathrebu drwy gyfrwng y Gymraeg.

O ran ein staff, rydym yn eu galluogi i ddefnyddio’r iaith o’u dewis yn eu gwaith bob dydd gymaint â phosibl. Rydym yn darparu ystod o hyfforddiant ar ysgrifennu a siarad Cymraeg gan annog staff sy’n dysgu Cymraeg i’w defnyddio gymaint ag sy’n bosibl er mwyn iddynt deimlo’n fwy cyfforddus a hyderus yn y Gymraeg. Mae gennym bolisi dwyieithrwydd mewnol sy’n hybu defnyddio’r Gymraeg a’r Saesneg fel ei gilydd yn y gweithle ac mae’n rhoi arweiniad i staff ar sut i roi hyn ar waith.

Rydym wedi ymrwymo i hyrwyddo a gwarchod yr iaith Gymraeg fel rhan hanfodol o’n treftadaeth Gymreig. Adlewyrchir hyn yn ein Cynllun Iaith Gymraeg (sy’n ofynnol yn ôl Deddf yr Iaith Gymraeg) sy’n dangos ein gwasanaeth dwyieithog ar y wefan hon.