Dyma ... Lwybr Glyndŵr

Cafodd Llwybr Glyndŵr ei ddatblygu’n bennaf ar gyfer cerddwyr. Cafodd ei ddynodi’n Llwybr Cenedlaethol yn 2000 ac fe gafodd ei lansio’n swyddogol yn Ebrill 2002. 

Mae’r Llwybr, sy’n 135m (217km) o hyd yn mynd o Drefyclo ger y ffin â Lloegr, i’r gorllewin i Fachynlleth ac yna’n ôl i’r Trallwng. Mae wedi ei enwi i gofio’r milwr Cymreig o’r bedwaredd ganrif ar ddeg, Owain Glyndŵr, Tywysog Cymru.

Mae Llwybr Glyndŵr yn croesi peth o wlad mwyaf godidog Cymru, gan gynnwys bryniau tawel Sir Faesyfed, glannau trawiadol Cronfa Ddŵr Llyn Clywedog a mynydd Pumlumon a’i rug trwchus. Mae golygfeydd gwych i’w cael o Gadair Idris, Cronfa Ddŵr Llyn Efyrnwy, Mynyddoedd y Cambria  a’r Golfa.

Cerdded y Llwybr

Mae’n bosib mwynhau Llwybr Glyndŵr yn un daith hir sy’n cymryd tua 9 niwrnod i’w cherdded fel arfer. Neu mae’n bosib cerdded mewn rhannau dros nifer o ddyddiau neu benwythnosau.

Dyw’r Llwybr ddim yn addas ar gyfer ceffylau na beiciau, er ei bod yn gyfreithlon i ddefnyddio rhai rhannau byr ar gyfer hynny.

Llety

Mae nifer o lefydd gwely a brecwast, tafarndai a gwestai bychain yn agos at y Llwybr ond mae llety yn brin mewn mannau, felly mae’n bwysig trefnu llety ymlaen llaw.