Ymweld â’r arfordir

Yng Nghymru y mae rhai o’r traethau gorau a glanaf yn y DU ac fe ddylai pawb gael cyfle i’w mwynhau.

Cynllun Gwella Mynediad i Arfordir Cymru

Rhaglen chwe blynedd (2007-2013) i wella a hyrwyddo mynediad i’r cyhoedd i arfordir Cymru ar droed, ar gefn ceffylau ac ar feiciau yw Rhaglen Gwella Mynediad i Arfordir Cymru.

Caiff y rhaglen ei hariannu gan Lywodraeth Cynulliad Cymru, ac maen nhw wedi sicrhau bod arian ar gael i’r Cyngor Cefn Gwlad fel y gellir cynnig grantiau i holl awdurdodau lleol arfordirol Cymru – mae pob un o’r rhain yn datblygu ac yn cyflawni rhaglenni lleol ar gyfer mynediad i’r arfordir. Rhaid i bob un o’r awdurdodau hyn sefydlu Partneriaeth Leol sy’n cynnwys budd-ddeiliaid fel y gallant gyfrannu at ddatblygiad y rhaglen a’r cynlluniau cyflawni.

Yn 2007/08, buddsoddwyd £1.5 miliwn yn y Rhaglen, a neilltuwyd £2 miliwn yn 2007/08.

Pwrpas y Rhaglen

1. Annog a galluogi’r cyhoedd – sef trigolion lleol ac ymwelwyr fel ei gilydd – i fwynhau arfordir Cymru.
2. Annog a galluogi mwy o bobl i fwynhau gweithgarwch corfforol ar hyd yr arfordir, gan ein cynorthwyo i ddod yn genedl iachach a mwy heini.
3. Sicrhau bod mynediad i’r arfordir yn gynnyrch blaenllaw ar gyfer twristiaid, gan ddod â buddion economaidd i gymunedau arfordirol.

Mae’r Rhaglen yn cynnwys dwy elfen ddaearyddol – Llwybr Arfordir Cymru a Pharth Arfordirol Cymru.

Llwybr di-dor o amgylch y wlad, a fydd ar gael ar ei hyd i gerddwyr, ac ym mhob man sy’n ymarferol i seiclwyr a marchogion, yw Llwybr Arfordir Cymru. Fe fydd mor agos i’r arfordir â phosibl, o fewn terfynau’r gyfraith, a bydd yn ystyried anghenion yn ymwneud ag iechyd a diogelwch, rheoli tir a chadwraeth. Y gobaith yw y bydd y Llwybr yn cael ei agor yn swyddogol yn 2012.

Mae Parth Arfordirol Cymru yn ymestyn 2 gilomedr i’r tir o gyfeiriad yr arfordir. Y bwriad yw cysylltu’r parth hwn efo’r arfordir a Llwybr Arfordir Cymru trwy ddatblygu cyfleoedd i gerdded, seiclo a marchogaeth er mwyn creu:

• cysylltiadau rhwng yr arfordir ac aneddiadau, gwasanaethau a mannau diddorol eraill
• llwybrau cylchol ar gyfer cerddwyr ac eraill
• llwybrau amgen ar gyfer Llwybr Arfordir Cymru