Ymateb i newid yn yr hinsawdd
Rhaid i ni weithredu i
ymladd newid yn yr hinsawdd - ac mae’n rhaid gwneud hynny ar
unwaith. Ond beth ddylem ni ei wneud i ddelio gyda phroblem
mor gymhleth?
Mae dwy ffordd, gyflenwol, o ddelio gyda newid yn yr
hinsawdd.
- Gallwn geisio cael llai o’r pethau sy’n achosi’r newid –
lliniaru
- Gallwn addasu i effeithiau’r newidiadau
Taclo’r achosion
Gallwn geisio sefydlogi a gostwng y crynodiad o garbon deuocsid
a nwyon tŷ gwydr eraill sy’n achosi newidiadau i’r atmosffer.
Lleihau gollyngiadau yw un o’r ffyrdd pwysicaf o leihau maint ac
effaith newid yn yr hinsawdd. Gelwir hyn yn lliniaru.
Mae cytundebau rhyngwladol megis Protocol Kyoto’n talu sylw i
hyn. I’r rhain fod yn llwyddiannus, fodd bynnag, rhaid
gwireddu’r cytundebau hyn ar lefel y gymuned. Mae’r Cyngor
Cefn Gwlad yn arwain drwy esiampl drwy ostwng faint o ynni mae’n ei
ddefnyddio ac yn annog eraill i fyw mewn ffordd fwy
cynaliadwy.
Gall plannu coed sy’n cloi’r carbon deuocsid a diogelu
ffynonellau pwysig o garbon fel gorgorsydd fod o help hefyd, ond
dim ond ychydig.
Addasu i’r effeithiau
Mae hyd yn oed y senarios mwyaf optimistig yn rhagweld o leiaf
40 mlynedd o newid arwyddocaol yn yr hinsawdd – hyd yn oed os ydym
yn llwyddo i reoli gollyngiadau byd-eang.
Mewn gwirionedd, mae gollyngiadau byd eang o garbon deuocsid yn
cynyddu’n gyflymach nag erioed o’r blaen.
Mae’n anorfod y ceir newidiadau amgylcheddol
arwyddocaol. Felly bydd gofyn i ni addasu ein polisïau
ar gyfer cadwraeth natur, diogelu tirwedd a hamdden.