Safle Rhwydwaith Newid Amgylcheddol yr Wyddfa

Mae Cyngor Cefn Gwlad Cymru a Llywodraeth Cynulliad Cymru’n noddi safle Rhwydwaith Newid Amgylcheddol y DU ar yr Wyddfa ar y cyd. Rhwydwaith Newid Amgylcheddol y DU yw rhaglen integredig, hirdymor y DU er mwyn monitro’r amgylchedd ac ymchwilio iddo.  Mae’r Rhwydwaith yn casglu gwybodaeth am y pwysau ar systemau ffisegol, cemegol a biolegol, a’r ymateb i newid amgylcheddol yn y systemau hyn.

Mae’r Rhwydwaith Newid Amgylcheddol ar yr Wyddfa 500 metr uwchben lefel y môr ac ymwelir ag ef drwy’r flwyddyn. Cesglir llawer iawn o ddata bob wythnos yn ychwanegol at ddata a gesglir yn barhaus o’r Orsaf Dywydd Awtomatig.

 

Mae’r wybodaeth gan yr Orsaf Dywydd Awtomatig yn cael ei rhoi ar wefan yn awtomatig ac mae llawer o bobl sy’n mynd i fyny’r Wyddfa’n edrych arni. Mae wedi’i chysylltu hefyd â gorsafoedd tywydd eraill ar yr Wyddfa. Cliciwch ar y ddolen gyswllt ar waelod y dudalen er mwyn gweld ein safle tywydd.

 

Cesglir ystod eang o newidynnau, o chwilod ac ystlumod i loynnod byw (un o’r gloynnod byw sy’n gyffredin ar yr Wyddfa yw’r glöyn byw gwyn gwythiennau gwyrddion a welir yma). Mae’r holl ddata am loynnod byw wedi’u cysylltu â Chynllun Monitro Gloynnod Byw y DU. Gweler y ddolen gyswllt i dudalen y Cynllun ar y we am fwy o wybodaeth.

 

Yn 2006 dechreuasom safle Rhwydwaith Newid Amgylcheddol dŵr croyw yn Nant Teyrn ar yr Wyddfa i gydredeg â’n safle tir. Byddwn yn edrych ar nifer o wahanol bethau gan gynnwys diatomau a macroffytau. Bydd hyn yn golygu bod gan y Rhwydwaith Newid Amgylcheddol dri safle dŵr croyw yng Nghymru.

 

Mae casglu gwybodaeth ffenolegol yn rhan bwysig o’r gwaith ar safle’r Wyddfa. Cesglir gwybodaeth ynglŷn â pha bryd y mae gwahanol bethau’n digwydd mewn gwahanol rywogaethau, o ddeoriad penbyliaid i flaguryn cyntaf y tormaen porffor. Anfonir yr holl wybodaeth i Rwydwaith Ffenoleg y DU lle caiff ei chyfuno â miloedd o setiau eraill o ddata i roi gwybodaeth inni am newidiadau yn ein hamgylchedd o ganlyniad i newid yn yr hinsawdd. Cliciwch ar y ddolen gyswllt ar waelod y dudalen hon er mwyn ymweld â gwefan y Rhwydwaith.

 

Mae gennym hefyd safle amonia yn Nyffryn Mymbyr sy’n rhan o Rwydwaith Monitro Amonia cenedlaethol y DU. Dilynwch y ddolen gyswllt ar waelod y dudalen hon er mwyn ymweld â’r wefan a gweld canlyniadau monitro amonia ar y safle hwn er 1997.

Mae tîm y Rhwydwaith Newid Amgylcheddol ym Marchlyn Mawr hefyd yn monitro osôn. Mae’r canlyniadau wedi’u cysylltu â Fforwm Ansawdd Aer Cymru. Cliciwch ar y ddolen gyswllt ar waelod y dudalen hon er mwyn cael mwy o wybodaeth.

Yn ogystal â chasglu samplau glaw ar y safle i’r Rhwydwaith Newid Amgylcheddol rydym hefyd yn eu casglu fel rhan o’r rhwydwaith Monitro Dyddodiad Dŵr Asid.

Mae’r holl ddata a gesglir gennym yn cael eu hanfon i Uned Gydlynu Ganolog y Rhwydwaith Newid Amgylcheddol yng Nghanolfan Ecoleg a Hydroleg Lancaster ac yn cael eu cadw yno. Gallwch weld crynodeb o’r holl ddata a gasglwyd gan bob un o’r safleoedd drwy ddilyn y ddolen gyswllt ar waelod y dudalen. Bydd y wefan hon hefyd yn egluro popeth y mae angen ichi ei wybod am y Rhwydwaith Newid Amgylcheddol.