Rhywogaethau Rhostir

At ei gilydd, ystyrir rhostir yn gynefin sy'n dlawd o ran rhywogaethau — ond mae rhostir Cymru'n gysylltiedig ag amrywiaeth o rywogaethau planhigion ac anifeiliaid arbennig.

Mae rhai o'r planhigion prinnach sy'n ymgartrefu yn y cynefin hwn yn cynnwys: y cor-rosyn rhuddfannog, cen strap blewynnog, a chen eurwallt ar rostir arfordirol; y millyn grugog a'r toddaidd gwelw ar rostir gwlyb; a'r cor-rosyn lledlwyd ar rostir calchfaen.

Clywir adar megis clochdar y cerrig a'r llinos yn canu'n aml o glytiau o rug tal ac eithin. Mae brain coesgoch, gyda'u pigau a’u coesau cochion nodedig, yn nodweddiadol o rostiroedd arfordirol — gwyliwch amdanynt yn ymborthi ymysg rhosydd byrion a thir glas Sir Benfro, Llŷn ac Ynys Môn. Yn rhostiroedd iseldir De a Gorllewin Cymru, efallai y cewch olwg ar delor Dartford, newydd-ddyfodiad i'r ardal sydd wedi symud yma’n ddiweddar o'i hen gylchoedd yn ne-orllewin Lloegr.

Craffwch yn agosach, ac fe welwch fod rhostiroedd iseldir yn cynnwys rhai creaduriaid di-asgwrn-cefn nodedig. Mae morgrugyn du'r gors, er enghraifft, yn nythu mewn rhostir gwlyb, tra bod y fursen ddeheuol i'w chael ar nentydd a ffrydiau ar rostir gwlyb a chorsydd. Mae'n well gan y glesyn serennog, ar y llaw arall, lecynnau lle ceir llystyfiant cynnes, agored, lle bydd ei lindys yn ymborthi ar rug, eithin a physen y ceirw.