Cynllun Gweithreddu Bioamrywiaeth y Deyrnas Unedig

Bioamrywiaeth yw’r holl fywyd amrywiol a geir ar y ddaear, popeth byw, gan ein cynnwys ni.

Yn y DU, mae 391 o rywogaethau a 45 o gynefinoedd wedi eu rhestru fel bod â blaenoriaeth, ac mae cynlluniau gweithredu i’w cael ar eu cyfer.   Bob tair blynedd caiff adroddiadau eu llunio am y cynnydd a wneir o ran y gweithredu a’r targedau sy’n cael eu pennu yn y cynlluniau yma.   O blith y rhain, mae 175 o rywogaethau a 38 o gynefinoedd yn berthnasol i Gymru.

Adroddiad Cymru o Gyfnod Adrodd Cynllun Gweithredu’r DU ar Fioamrywiaeth 2005

Mae adroddiad Cymru o gyfnod adrodd Cynllun Gweithredu’r DU ar Fioamrywiaeth 2005 ar gael yma yn awr.

This Mae’r adroddiad hwn yn gwbl ryngweithiol. Mae’n cyflwyno is-set o ddata ar gyfer Cymru ac yn cynnwys manylion llawn. Edrychwch ar y data a chliciwch ar y tablau a’r graffiau er mwyn gweld y data manwl.

Gwelodd Uwchgynhadledd y Byd yn Rio ym 1992 arweinwyr y byd yn cwrdd am y tro cyntaf gydag un pryder cyffredin ynglŷn â chyflwr amgylchedd ein byd.

Yn sgîl yr Uwchgynhadledd yma, paratowyd rhaglen weithredu o’r enw Agenda 21 i hybu Datblygu Cynaliadwy. Arwyddodd dros 170 o wledydd y cytundeb, gan gynnwys y Deyrnas Unedig. Un o’r elfennau oedd datblygu Cynllun Gweithredu Bioamrywiaeth.

Cyhoeddodd Llywodraeth y Deyrnas Unedig “Bioamrywiaeth: Cynllun Gweithredu’r Deyrnas Unedig” ym 1994 a sefydlwyd Grŵp Llywio Bioamrywiaeth er mwyn gweithredu’r rhaglen waith a oedd o fewn y cynllun.

Mae Grŵp Llywio Bioamrywiaeth y Deyrnas Unedig yn gosod nodau a thargedau gan gynnwys datblygu cynlluniau wedi’u prisio ar gyfer y rhan fwyaf o gynefinoedd a rhywogaethau sydd ar drai neu o dan fygythiad; ynghyd â hybu Cynlluniau Gweithredu Bioamrywiaeth Lleol (CGBLl). Mae’r cynlluniau lleol hyn yn hanfodol ar gyfer sicrhau bod cadwraeth yn digwydd ar lefel leol.

Mae gan Gynllun Bioamrywiaeth Lleol agenda gyfrannol ar gyfer diogelu a chynyddu bioamrywiaeth ac fe ddylai ddatblygu drwy fagu consensws. Er ei bod yn bosibl y bydd un sefydliad yn arwain, dylai pob un sy’n gysylltiedig â’r amgylchedd lleol fod yn berchen arno. Felly, sefydlu partneriaethau yw un o elfennau pwysicaf y broses Cynllun Gweithredu Bioamrywiaeth Lleol.

Dyma’r dulliau allweddol:

• Partneriaeth – gweithredu yn cynnwys cydweithredu rhwng sectorau statudol, gwirfoddol, academaidd a busnes ar lefelau cenedlaethol a lleol.
• Targedau – rhaid sefydlu canlyniadau mesuradwy sy’n cwrdd ag anghenion mathau o rywogaethau a chynefinoedd sy’n ymwneud yn bennaf â gwarchod bioamrywiaeth.
• Integreiddio Polisi – cydnabod bod angen newid mewn polisi i wrth‑droi’r lleihad yn adnodd bioamrywiaeth yn y Deyrnas Unedig ac i gynnal datblygu cynaliadwy ym mhob sector o’r gymdeithas.
• Gwybodaeth – tra dylai gwyddoniaeth a gwybodaeth gadarn fod wrth wraidd penderfyniadau, rhaid cydnabod bod angen ymdriniaethau newydd er mwyn llenwi bylchau mewn gwybodaeth a dealltwriaeth ac i reoli’r wybodaeth sydd eisoes ar gael yn fwy effeithiol.
• Ymwybyddiaeth Gyhoeddus – mae angen i’r cyhoedd ddeall a gweithredu er mwyn cefnogi’r newidiadau sydd eu hangen i gynnal bioamrywiaeth.