Ffermio – at y dyfodol
Yng Nghymru, mae gan amaethyddiaeth rôl bwysig
iawn i’w chwarae yn ein cymunedau gwledig o safbwynt economaidd,
diwylliannol ac amgylcheddol.
Cynghori’r llywodraeth
Mae Cyngor Cefn Gwlad Cymru’n cael ei
gynrychioli ar ystod eang o grwpiau cynghori’r Cynulliad
Cenedlaethol gan gynnwys y rhai sy’n delio gyda pholisi
amaeth-amgylcheddol, ffermio cynaliadwy a Chyswllt Ffermio.
Rydym yn cynnig cyngor i Lywodraeth Cynulliad
Cymru drwy ymateb i ymgyngoriadau ar bob mater sy’n ymwneud ag
effaith amgylcheddol amaethyddiaeth, gan gynnwys:
- diwygio’r Polisi Amaethyddol Cyffredin
(PAC);
- paratoi Cynllun Datblygu Gwledig Cymru;
- rheoli tir comin;
- Asesu Effeithiau Amgylcheddol;
- cynllunio gwasanaethau cynghori
ffermwyr.
Mae’r Cyngor Cefn Gwlad wedi helpu i gynllunio
nifer o gynlluniau amaeth-amgylcheddol, fel Tir Cymen, Tir Gofal a
Thir Cynnal, ac roedd hefyd yn gyfrifol am redeg y cynlluniau hyn
hyd at Hydref 2006.
Yn ychwanegol at hyn mae’r Cyngor Cefn Gwlad
yn aelod o Gynghorau Ymgynghorol Ewrop ar yr Amgylchedd a Datblygu
Cynaliadwy (EEAC). Rhwydwaith o gynghorwyr statudol o 22 gwlad sy’n
rhan o’r Undeb Ewropeaidd yw hwn. Nod Cyngor Cefn Gwlad Cymru yw
ysgogi trafodaeth ar ystod eang o faterion amgylcheddol sy’n
debygol o fod angen newidiadau polisi ar lefel yr UE.
Gweithio gyda’n gilydd
www.lupg.org.uk
Mae
cydweithio rhwng yr holl asiantaethau sy’n ymwneud ag
amaethyddiaeth a’r amgylchedd yn bwysig. Mae Cyngor Cefn Gwlad
Cymru’n aelod o’r Grŵp Polisi Defnydd Tir. Grŵp rhyngasiantaethol
yw hwn a’i rôl yw:
- gwella dealltwriaeth o fecanweithiau polisi
amaethyddiaeth a choedwigaeth presennol yr UE;
- datblygu safbwyntiau cyffredin ynglŷn â
chynigion i ddiwygio; a
- hybu’r safbwyntiau hyn gan ystyried yr un
pryd yr amgylchiadau amrywiol sydd yn y DU.
Mae’r grŵp yn cynnwys cynrychiolwyr o Natural England,
Asiantaeth yr Amgylchedd, y Cydbwyllgor Cadwraeth Natur,
Treftadaeth Naturiol yr Alban a Gwasanaeth Amgylchedd a
Threftadaeth Gogledd Iwerddon, yn ogystal â Chyngor Cefn Gwlad
Cymru.