Y Cyngor Cefn Gwlad a pholisi amaethyddol

Mae gan y Cyngor Cefn Gwlad rôl weithredol wrth gynghori’r llywodraeth a swyddogion ynglŷn â’r ffordd orau i ddatblygu a gweithredu polisi amaethyddol.

Dyma rai enghreifftiau ychwanegol o’r polisïau y mae’r Cyngor Cefn Gwlad yn cynghori yn eu cylch:

Adolygiad o’r polisi Ardaloedd Llai Ffafriol

Mae’n anodd ffermio mewn Ardaloedd Llai Ffafriol – sy’n cynnwys tua 80% o’n tir amaethyddol - oherwydd yr hinsawdd, nodweddion tirwedd neu eu lleoliad.  Mae hwn yn adnodd  sylweddol o ran tirwedd, amrywiaeth bywyd gwyllt, nodweddion diwylliannol a mwynhad y cyhoedd.

Cred y Cyngor y dylai’r adolygiad polisi (sydd ar y gweill) bwysleisio fod rhaid rheoli tir mewn ffordd gynaladwy ac integredig. Mae angen diogelu adnoddau sylfaenol fel pridd a dŵr; mae angen i ni allu delio ag effeithiau newid yn yr hinsawdd ac mae’n rhaid  i ni atal y dirywiad mewn amrywiaeth bywyd gwyllt.

Cynllun Datblygu Gwledig Cymru

Mae amcanion polisïau datblygu gwledig 2007-13 yn cynnwys cynyddu gallu cystadleuol y sector amaethyddol, gwell rheolaeth ar dir, gwella ansawdd bywyd yn yr ardaloedd gwledig a hyrwyddo agweddau cymunedol.

Cred y Cyngor Cefn Gwlad ei bod hi’n hanfodol mabwysiadu dulliau integredig er mwyn gwireddu’r amcanion hyn.

Mae angen inni hefyd gynnal y rhaglen Tir Gofal. Bydd targed blynyddol o greu  500 o gytundebau a 50,000ha yn helpu i gynnal hygrededd y cynllun yng Nghymru ac ar draws Ewrop.

Mae Cynllun Gweithredu Strategaeth Amgylchedd Cymru wedi gosod targedau pendant ynglŷn â chyflwr Safleoedd o Ddiddordeb Gwyddonol Arbennig ac Ardaloedd Cadwraeth Arbennig. Er mwyn cyrraedd y targedau hyn, mae angen Tir Cynnal yn ogystal â Thir Gofal gan fod y cyntaf yn fwy eang. Os nad fydd y gronfa Tir Cynnal yn cael ei defnyddio’n llawn, mae’r Cyngor yn argymell yn gryf y dylai’r arian dros ben gael ei ddefnyddio i greu mwy o gytundebau Tir Gofal, yn ogystal â datblygu’r cynllun rheoli tir cydweithredol ar yr haen uchaf.

Cynlluniau Taliad Sengl

Yn y gorffennol, mae’r Cyngor Cefn Gwlad wedi galw am gyflwyno Cynlluniau Taliad Sengl cyn gynted â phosib ar yr amod fod hynny’n cydredeg gydag ailgyfeirio’r gwasanaeth Cyswllt Ffermio.

Mae’r Cyngor wedi nodi hefyd y byddai symud yn rhy gyflym tuag at daliadau ardal yn effeithio’r economi gwledig yng Nghymru yn y tymor byr.