Pridd – mor werthfawr â choedwigoedd glaw

Mae pridd yn rhan allweddol o’n treftadaeth naturiol gan gyflawni amrywiaeth eang o swyddogaethau. Mae priddoedd hefyd ymhlith cynefinoedd mwyaf amrywiol y ddaear gyda chymaint o rywogaethau â choedwigoedd glaw trofannol.

Mae priddoedd yn cael eu colli oherwydd datblygu, a’u gwerth yn gostwng o ganlyniad i ddefnydd tir. Oherwydd eu bod yn cymryd cymaint o amser i ffurfio, mae modd eu hystyried yn adnoddau na fedrwn ni eu hadnewyddu.

Rheoli pridd

Dim ond yn ddiweddar y daeth pobl yn ymwybodol o bwysigrwydd pridd ac, yn 1996, cafwyd adroddiad arbennig “Sustainable Use of Soil”, yn gwneud argymhellion i Lywodraeth y DU. Awgrymodd y dylai’r Llywodraeth baratoi strategaeth i sicrhau fod priddoedd yn cael eu gwarchod yn iawn a’u defnyddio mewn ffordd gynaladwy.

Gwaith y Cyngor Cefn Gwlad

Mae’r Cyngor Cefn Gwlad wedi chwarae rhan allweddol wrth ddatblygu polisïau cenedlaethol ac Ewropeaidd ar bridd. Rydym hefyd yn rhoi cyngor ynglŷn â chadwraeth pridd ac yn ceisio cynyddu dealltwriaeth o faterion pridd yn y DU.