Beth yw defnydd tir a pham ei fod yn bwysig?
Rydym yn defnyddio’r tir i gynhyrchu bwyd,
ffeibr, coed ac ynni – pethau y mae ein bywydau yn dibynnu arnynt.
Mae’r ffordd y byddwn yn defnyddio’r tir yn cael effaith
uniongyrchol ar yr amgylchedd – o natur tirwedd i adnoddau
naturiol..
Mae defnydd tir mewn ardaloedd gwledig yn golygu mwy na
chynhyrchu bwyd a choed yn unig. Mae’n darparu swyddi i’r bobl sy’n
byw yno – sail economaidd i gymunedau gwledig sy’n dylanwadu ar
ansawdd byw y bobl.
Mae’r berthynas rhwng ffermio, coedwigaeth, cymunedau lleol a’r
amgylchedd wedi newid yn ystod y degawdau diweddar. Mae arferion
rheoli tir yn fwy dwys ac yn fwy arbenigol erbyn hyn. Mae’r
newidiadau hyn wedi eu cysylltu â dirywiad yn amrywiaeth byd natur
– o ran rhywogaethau ac ansawdd y pridd a’r dŵr. Rydym hefyd wedi
gweld gostyngiad yn nifer y bobl sy’n gweithio ym myd amaeth a
choedwigaeth, a hynny’n cael effaith sylweddol ar lawer o gymunedau
gwledig.
Sut mae’r newidiadau wedi digwydd? Mae’n debyg eu bod wedi
codi yn sgîl cyfuniad o ffactorau gan gynnwys :
- Effeithiau’r Polisi Amaeth Cyffredin
- Datblygiadau technolegol
- Patrymau prynu gwahanol
- Disgwyliadau cymdeithasol
Yn gynyddol, mae materion fel globaleiddio’r farchnad, newid yn
yr hinsawdd a disgwyliadau’r cyhoedd yn mynd i ychwanegu at y
pwysau sydd ar ddiwydiannau traddodiadol cefn gwlad a’r
cymunedau.
Mae’r Cyngor Cefn Gwlad yn aelod o grŵp sawl-asiantaeth o’r enw
y Grŵp Polisi Defnydd Tir (LUPG). Drwy’r grŵp yma, rydym yn ceisio
gwella ein dealltwriaeth o drefniadau polisi cyfredol ar lefel yr
Undeb Ewropeaidd ac yn datblygu safbwyntiau cyffredin ynglŷn â’r
ffordd orau i’w diwygio.