Y Confensiwn Tirwedd Ewropeaidd (CTE)

Y CTE yw’r cytundeb rhyngwladol cyntaf i ddelio’n arbennig â thirwedd. Mae’r datblygiad hwn dan Gyngor Ewrop yn cynnig fframwaith eang ar gyfer cynllunio a rheoli pob tirwedd ar draws y gwledydd sy’n aelodau. Mae bellach yn cynnwys y DU a arwyddodd a chymeradwyo’r CTE, i ddod yn weithredol o 1 Mawrth 2007 ymlaen.

Mae’r Cyngor Cefn Gwlad yn falch o allu cefnogi diffiniad y CTE o ‘dirwedd’, fel “ardal, fel y gwelir hi gan bobl, sydd â’i chymeriad yn ganlyniad i effaith ffactorau dynol a naturiol a’r gweithio a’r adweithio rhyngddyn nhw”.

Mae’r CTE yn cyfleu cytundeb ynglŷn â rhai egwyddorion a gweithredoedd craidd:

• Sicrhau fod pobl – o bob diwylliant a chymuned – a’u hamgylchedd, wrth galon cynllunio gofodol a datblygu cynaladwy.
• Cydnabod fod tirwedd ymhobman, nid mewn llefydd arbennig yn unig a, boed yn hardd neu wedi’i difrodi, ei bod yn dreftadaeth gyffredin i bawb.
• Cynyddu ymwybyddiaeth a dealltwriaeth o dirwedd a’i gwerth, yn fframwaith sy’n uno pob sector o ddefnydd tir.
• Hyrwyddo agwedd fwy cyfansawdd, hygyrch a blaengar at reoli tirweddau a etifeddwyd a thirweddau newydd.

Mae’r ymrwymiadau hyn yn cael eu gweithredu o fewn fframwaith polisi a chyfraith cartref. Mae hyn yn bwysig, oherwydd ei fod yn caniatáu inni weithredu oddi mewn i’r trefniadau sydd gennym eisoes ar gyfer trin ein tirwedd, gan adeiladu ar y gwaith sydd wedi ei wneud.

Yr un mor bwysig, mae’r CTE yn dangos agwedd realistig ac yn edrych ymlaen, yn hytrach na chanolbwyntio ar warchod: ystyrir fod creu tirweddau’r dyfodol yn llawn cymaint o darged â rheoli’n gynaladwy y rhai a etifeddwyd gennym.