Cynnwys

Hafod Garregog

Gwarchodfa dawel, anghysbell yw Hafod Garregog. Mae’n cynnwys ardal eang o goetir sy’n tyfu ar glogwyni creigiog a llecynnau o ddaear wlyb ar y tir isel rhyngddyn nhw.

Mae hefyd wedi ei dynodi yn Safle o Ddiddordeb Gwyddonol Arbennig Coedydd Dyffryn Nanmor.

Cyfeirnod Grid: SH601443 Maint: 86.70 hectarau

Hafod Garregog

yn ôl i’r map

Ymweld

Gallwch gerdded trwy ran o’r coetir neu grwydro i lawr at yr afon. Mae’r golygfeydd yn ôl o’r fan hyn tuag at y mynyddoedd yn arbennig o wych.

Mae’r ffordd yn dawel gyda rhai rhiwiau cymedrol (hyd at 1:10 mewn darnau byr).

Hafod Garregog

Hafod Garregog _{Lluniau ⓗCCGC}

Mae’r llwybr at yr afon yn wastad, gan ddilyn lein Rheilffordd Ucheldir Cymru, sy’n cael ei hadeiladu ar hyn o bryd.

Sut i gyrraedd

Mae’r warchodfa 6.5 km i’r gogledd o Borthmadog ar yr A4085 hanner ffordd rhwng Penrhyndeudraeth a Beddgelert.

Mae llefydd parcio anffurfiol ar ben draw’r ffordd darmac sy’n gadael yr A4085 ger Pont Talyrni, tua 5.5km i’r de o Feddgelert. Mae ychydig lefydd parcio hefyd ar fuarth fferm Hafod y Llyn Uchaf, sydd ar ffordd fechan sy’n gadael yr A4085 ar drofa fawr tua dwy filltir i’r de o Feddgelert.

Cludiant Cyhoeddus
Mae bws yn mynd hyd yr A4085 o Benrhyndeudraeth i Feddgelert. Er mwyn cael rhagor o wybodaeth, cysylltwch â Traveline Cymru ar 0871 2002233

Bydd gwasanaeth newydd trên bach Rheilffordd Ucheldir Cymru o Gaernarfon (a Phorthmadog yn y pen draw) yn agor cyn bo hir. Mae’r rheilffordd yn cael ei hadeiladu ar hyn o bryd a bydd rhagor o wybodaeth wrth nesu at ei gorffen.

Cyfleusterau

Does dim cyfleusterau ar y warchodfa.

Ym Meddgelert y mae’r toiledau agosaf sy’n hygyrch i bawb neu ym maes parcio’r Ymddiriedolaeth Genedlaethol ger Pont Aberglaslyn ar yr A4085 ger Nantmor.

Hafod Garregog _{Llun ⓗCCGC}

Pwy sy’n gofalu amdani?

Yr Ymddiriedolaeth Genedlaethol sy’n berchen ar y warchodfa (a’r tir ffermio cyfagos sy’n cynnwys afon Glaslyn) ac mae’n ei rheoli gyda’r Cyngor Cefn Gwlad.

Gallwch gysylltu â Swyddfa Ranbarthol yr Ymddiriedolaeth ar 01492 860123. Gallwch hefyd gysylltu â Thîm Gwarchodfeydd (Rhanbarth y Gogledd) y Cyngor trwy ein llinell ymholiadau, 0845 1306229, e-bost ymholiadau@ccw.gov.uk neu ysgrifennu aton ni trwy’r adran ‘Cysylltu â’r tîm’ ar y wefan hon.

Bywyd gwyllt

Hafod Garregog _{Llun ⓗCCGC}

Mae amrywiaeth mawr o gynefinoedd yma o fewn ardal cymharol fychan, a’r rheiny’n cynnal amrywiaeth eang o blanhigion ac anifeiliaid.

Mae’r coetir yn enghraifft ardderchog o goedydd derw digoes yr Iwerydd, sy’n nodweddiadol o’r rhan hon o Gymru. Mewn llefydd mae bedw a chriafol yn gymysg â’r coed derw ac oddi tanyn nhw mae haen denau o goed cyll a chelyn.

Ar y ddaear, mae planhigion blodeuog megis perwellt y gwanwyn, peiswellt y defaid, gliniogai, clychau glas, rhedyn ac amrywiaeth o fwsoglau, llysiau’r afu a chen y coed.

Mae yma hefyd lecynnau o gors asidaidd ac mae’r planhigion yn cynnwys helyg Mair. Yn y rhannau llai asidaidd, mae yna fwsoglau, gwlithlys, llafn y bladur a chorsfrwyn gwyn.

Hafod Garregog _{Llun gan Mike Bailey, ⓗCCGC}

Mae’r warchodfa hefyd yn nodedig am amrywiaeth ei thrychfilod – rhai yn arbennig o brin, megis glöyn byw y glesyn serennog a’r fursen anghyffredin Ceriagron tenellum.

ERTHYGLAU PERTHNASOL

GWELER HEFYD...

Mapiau Mynediad i Gefn Gwlad
I gael map mwy manwl o’r ardal yn dangos gwybodaeth am fynediad, gan gynnwys: llwybrau wedi’u hyrwyddo, llwybrau cenedlaethol a thir mynediad CGHT (CROW).

Map o Ardaloedd Gwarchodedig
I gael map mwy manwl o’r ardal a’r Warchodfa Natur Genedlaethol, yn ogystal â safleoedd arbennig ychwanegol, gan gynnwys: Safleoedd o Ddiddordeb Gwyddonol Arbennig ac ardaloedd tirwedd fel Parciau Cenedlaethol.