Gwarchodfeydd Natur Cenedlaethol

Ceir 71 o Warchodfeydd Natur Cenedlaethol (GNG) yng Nghymru sy’n amrywio mewn maint o hanner hectar i bron i 8,000 hectar.

Gwarchodfeydd Natur Cenedlaethol – beth ydyn nhw?

Gwarchodfeydd Natur Cenedlaethol yw’r enghreifftiau gorau oll o gynefinoedd a safleoedd bywyd gwyllt, sydd efallai hefyd yn cynnwys nodweddion daearegol diddorol. Maen nhw’n amrywio o gopaon mynyddoedd, coedydd derw hynafol, gwlyptiroedd, mawnogydd a thwyni tywod i ynysoedd anghysbell yn y môr. Mae’r cyfan yn arbennig yn eu ffyrdd eu hunain – bydd gan rai gasgliadau hynod o wahanol rywogaethau, eraill gynefinoedd prin a bydd gan rai nodweddion naturiol trawiadol, fel ffurfiau anarferol o greigiau neu ogofau.

Mae’r holl warchodfeydd hefyd yn Safleoedd o Ddiddordeb Gwyddonol Arbennig a chânt eu defnyddio nhw ar gyfer prosiectau addysgol, ymchwil ac arbrofion rheoli.

Sut maen nhw’n cael eu rheoli?

Ein nod yw fod y Gwarchodfeydd Cenedlaethol yn gosod safon rheoli ar gyfer pob gwaith cadwraeth a mynediad. Mae’r Cyngor Cefn Gwlad yn berchen ar rai ac yn lesio eraill.

Mewn rhai achosion, byddwn yn gweithio mewn partneriaeth gyda thirfeddianwyr a pherchnogion, sy’n cytuno i ddefnyddio a rheoli’r tir mewn ffordd sydd o fudd i fywyd gwyllt a’u cynefinoedd.

Mae rhai gwarchodfeydd yn cael eu rheoli’n llwyr gan gyrff eraill fel yr Ymddiriedolaethau Natur, y Gymdeithas Warchod Adar neu gyngor lleol.

Mae gan pob un o warchodfeydd y Cyngor Cefn Gwlad dîm rheoli pwrpasol gyda rhaglen o waith i reoli nodweddion arbennig y safle. Mae gan rai gwarchodfeydd wardeniaid preswyl, sy’n helpu gyda chadw ansawdd y safle, materion mynediad, delio gyda thirfeddianwyr ac ymwelwyr a goruchwylio gwaith ymchwil.

Ymweld â’r Gwarchodfeydd Cenedlaethol

Mae croeso i ymwelwyr, ar yr  amod fod mynediad i’r safle’n ddiogel ac na fydd eu presenoldeb yn niweidio cynefinoedd neu fywyd gwyllt neu’n amharu ar fuddiannau perchnogion a thenantiaid. Bydd angen trwydded i ymweld â rhai o’r gwarchodfeydd.