Parc Cenedlaethol Eryri

Mae Parc Cenedlaethol Eryri yng ngogledd orllewin Cymru yn cynnwys 823 milltir sgwâr o gefn gwlad prydferth. Mae’n cynnwys yr Wyddfa, mynydd uchaf Lloegr a Chymru – sy’n 1085 medr o uchel.

Pobl

Mae’r Parc yn gartref i bron 26,000 o bobl, sy’n byw a gweithio ar y tir ac yn y trefi a’r pentrefi. Mae cannoedd o filoedd o ymwelwyr yn treulio amser yma drwy’r flwyddyn – rhwng 6 a 10 miliwn o ddyddiau ymwelwyr bob blwyddyn. Dringo, cerdded, seiclo, chwaraeon dŵr yw’r gweithgareddau mwyaf poblogaidd. Cymraeg yw prif iaith bob dydd y rhan fwyaf o bobl y Parc – rhan hanfodol o’r diwylliant bywiog.  

Tirwedd

Mae cadwyni mynyddoedd uchaf Cymru a Lloegr yn Eryri, gyda phedwar copa dros 1000 medr a 14 dros 900 medr. Mae’r tir garw yn cynnwys llynnoedd ac afonydd a rhostiroedd eang. Mae dyn hefyd wedi gadael ei ôl gyda chestyll a chwareli a mwynfeydd sy’n segur bellach. Mae adfeilion tyddynnod a chutiau bugail yn ein hatgoffa o’r hen batrymau amaethyddol ar ochrau’r mynyddoedd. 

Bywyd gwyllt

Gyda’i dirwedd amrywiol a phob math o gynefinoedd – yn fynyddoedd uchel, dyffrynnoedd coediog, afonydd, llynnoedd ac arfordir - mae Eryri yn cynnal cymunedau o blanhigion ac anifeiliaid sydd o bwysigrwydd cenedlaethol a rhyngwladol. Ymhlith y planhigion alpaidd arctig sydd i’w canfod yn y copaon uchel mae Lili’r Wyddfa sy’n unigryw i’r mynydd. Felly hefyd Chwilen yr Wyddfa neu Chwilen yr Enfys. Yn ddiweddar, mae gweilch y môr wedi dechrau nythu ar ffin orllewinol y Parc.

Safleoedd wedi eu gwarchod

Mae tua 20% o Barc Cenedlaethol Eryri wedi ei ddynodi’n safleoedd arbennig gan gyfraith DU ac Ewrop, Ardaloedd Cadwraeth Arbennig a Safleoedd Ramsar. Mae 17 Gwarchodfa Natur Cenedlaethol yn Eryri, mwy nag mewn unrhyw Barc Cenedlaethol yn Lloegr a Chymru. Mae yma 56 Safle o Ddiddordeb Gwyddonol Arbennig.

Ymweld â’r Parc

Mae gwasanaethau bws arbennig ar gyfer ymwelwyr â’r Parc ynteithio mewn cylch o gwmpas yr Wyddfa. Mae canolfan ymwelwyr newydd yn cael ei hadeiladau ar gopa’r Wyddfa ei hun.