Gwarchod ar SoDdGA
Gwarchod SoDdGA
Os yw nodweddion arbennig y SoDdGA i’w gwarchod, nid yw dynodi’r
safleoedd hyn yn gyfreithiol ond yn gam cyntaf. Rhaid i CCGC hefyd
greu perthynas gadarn â thirfeddianwyr, deiliaid, asiantaethau
eraill a’r cyhoedd i sicrhau:
- nad yw’r safleoedd yn cael eu difrodi’n fwriadol neu’n
ddamweiniol;
- y cymerir camau cadarnhaol ac ymarferol i reoli a pharhau i
reoli cadwraeth y safle.
Cyswllt gyda Pherchnogion a Deiliaid
Dengys cofnodion bod CCGC wedi treulio tua 1,300 o ddiwrnodau yn
ystod 2005-06 yn cysylltu â pherchnogion a deiliaid SoDdGA i roi
cyngor, gwybodaeth a chymorth. Gallai hyn fod drwy ymweld â’r
safle, cyfarfod grŵp neu dros y ffôn, e-bost neu lythyr. Gall staff
helpu i dywys y perchennog drwy’r broses o ofyn am ganiatâd hyd at
gyflawni gwaith neu ddatblygiadau yn ogystal â rhoi cyngor ar
gymorth grant a rheoli cadwraeth ar yr ochr ymarferol.
Gwaith achos
Ymgynghorir yn ffurfiol â’r Cyngor ar ystod eang o geisiadau
cynllunio a datblygiadau a gweithgareddau arfaethedig eraill a
allai effeithio ar SoDdGA. Bydd y Cyngor yn argymell sut y gellir
efallai addasu’r datblygiad i sicrhau na achosir niwed i nodweddion
arbennig y safle. Mewn achosion eithafol, os yw’r niwed yn anorfod,
gall y Cyngor wrthwynebu i’r cais. Yn 2005-06, deliodd y Cyngor â
thua 16,570 o eitemau gwaith achos yng Nghymru, yn fawr a bach, yng
nghyswllt SoDdGA a chefn gwlad ehangach.
Traws-gydymffurfio
Mae ‘traws-gydymffurfio’ yn gyflwr o dderbyn cymorth amaethyddol
(o dan y Cynllun Taliad Sengl). Mae’n gofyn i ffermwyr gadw’r tir
mewn Cyflwr Amaethyddol ac Amgylcheddol Da’, ei fod yn cwrdd â
gofynion rheoli statudol sy’n golygu cydymffurfio â deddfwriaeth a
chytundebau SoDdGA. Treuliodd staff y Cyngor tua 61 o ddiwrnodau yn
ystod 2005-06 yn cysylltu â pherchnogion SoDdGA ynghylch materion
traws-gydymffurfio. Adroddwyd 23 o achosion tor-deddfwriaeth i
Gynulliad Cenedlaethol Cymru yn y flwyddyn, o rhain roedd 6 yn
ymwneud a SoDdGA.