Ein gwaith ni

Mae gan Gyngor Cefn Gwlad Cymru ddyletswydd dan y gyfraith i edrych ar ôl tirwedd Cymru. Mae ein gwaith yn y maes hwn yn rhannu’n dri – dewis a gwarchod tirweddau arbennig, rhoi grantiau a chynnig cyngor.

Dewis y llefydd arbennig

Tirweddau arbennig

• Mae’r Cyngor yn cynghori Llywodraeth Cynulliad Cymru ynglŷn â pha ardaloedd a ddylai gael eu dynodi’n Barciau Cenedlaethol ac yn Ardaloedd o Harddwch Naturiol Eithriadol. Ar hyn o bryd, mae’r rheiny’n cynnwys tua chwarter tir Cymru ac yn ardaloedd arbennig sy’n cael eu gwarchod rhag newid anaddas.
• Byddwn yn rhoi cyngor ynglŷn â diffinio rhai darnau o’r glannau yn Arfordir Treftadaeth ac rydym hefyd yn nodi’r morweddau mwyaf gwerthfawr o amgylch arfordir Cymru.
• Roedd gan y Cyngor ran yn y gwaith o greu cofrestr o dirweddau sydd o ddiddordeb hanesyddol arbennig.

Safleoedd arbennig

• Mae’r Cyngor Cefn Gwlad yn cynghori Llywodraeth Cynulliad Cymru ynglŷn â dynodi Safleoedd o Ddiddordeb Gwyddonol Arbennig. Rhaid i’r awdurdodau cynllunio a’r cwmnïau dŵr, nwy a thrydan ymgynghori gyda’r Cyngor cyn caniatáu unrhyw ddatblygiad a allai effeithio ar SoDdGA.
• Mae gan y Cyngor ran yn y gwaith o nodi darpar Ardaloedd Cadwraeth Arbennig, Ardaloedd Gwarchodaeth Arbennig a Safleoedd Ramsar.
• Y Cyngor sy’n datgan pa ardaloedd sy’n Warchodfeydd Natur Cenedlaethol. Mae’r Cyngor yn aml yn berchen ar y rheiny, neu yn eu lesio. Mae eraill yn nwylo cyrff cymwys.
• Bydd awdurdodau lleol yn ymgynghori gyda’r Cyngor Cefn Gwlad cyn sefydlu Gwarchodfeydd Natur Lleol.

Rhoi grantiau

Bydd y Cyngor Cefn Gwlad yn rhoi grantiau i gefnogi prosiectau sy’n gwella tirwedd ac a fydd, yn aml, yn helpu’r amgylchedd a bywyd gwyllt yr un pryd. Bydd grantiau hefyd yn cael eu rhoi at brosiectau mynediad, sy’n ei gwneud hi’n haws i bobl ymweld â chefn gwlad a’i fwynhau. Mae’r grantiau ar gael i awdurdodau lleol ac i gyrff yn y sectorau cyhoeddus a gwirfoddol.

Cynnig cyngor – yr effaith ar lefydd arbennig

Trydedd swyddogaeth y Cyngor Cefn Gwlad yw cynghori’r awdurdodau cynllunio ac eraill ynghylch datblygiadau a allai effeithio ar dirwedd – nid i atal datblygiadau angenrheidiol na newid, ond i leihau’r effaith ar y dirwedd.